Ümumi məqsəd: İctimai vəsaitlərin xərclənməsi üzərində nəzarətin səmərəliliyini artırmaq

Xüsusi məqsəd I: İctimai vəsaitlərin xərclənməsinə nəzarət edən orqanların, o cümlədən Milli Məclis və Hesablama Palatasının (HP) hüquqi və institusional potensialının gücləndirilməsi;

1-ci xüsusi məqsəd üzrə fəaliyyətlər:

Hesablama Palatasına dair qanunvericilik aktlarının təhlili (bura Hesablama Palatasının internet səhifəsində qanunvericilik bölməsinin digər normativ hüquqi aktlar alt bölməsində yer alan 8 Qanun, Prezidentin 10 Fərmanı, Milli Məclisin 7 Qərarı, Nazirlər Kabinetinin 5 Qərar və Sərəncamları, eləcə də Hesablama Palatasının normativ-metodiki sənədlərinə dair alt bölmədə qeyd olunan qaydalar daxildir);

• Hesablama Palatasının illik hesabatlarının təhlili;
• Beynəlxalq təcrübənin (İFAC, İİA, İNTOSAİ) və Avropa standartlarının (Gürcüstan, Baltik ölkələri, Rusiya, Ukrayna, Qazaxıstan və Avropa İttifaqının ali audit qurumlarının fəaliyyəti) öyrənilməsi, bu təcrübənin və beynəlxalq təşkilatların tövsiyələrinin geniş ictimaiyyətə təqdim edilməsi;
• Ekspertlərlə dərin müsahibələrin və fokus qrupun keçirilməsi (bu müsahibələrə Milli Məclisin üzvləri, Milli Büdcə Qrupuna daxil olan QHT rəhbərləri, müvafiq layihələrdə iştirak edən mütəxəssislər, tanınmış hüquqşünaslar cəlb ediləcək);
• Hesablama Palatasının fəaliyyətinə dair Milli Məclis stenoqramların təhlili;
• Beynəlxalq təşkilatların və maliyyə institutlarının, o cümlədən  Dünya Bankı, Beynəlxalq Maliyyə Fondu, Beynəlxalq Maliyyə Korporasiyası, BMT, Avropa Yeenidənqurma və İnkişaf Bankı, Asiya İnkişaf Bankının rəyinin öyrənilməsi;
• Hesablama Palatasının fəaliyyətinin səmərəliliyinin artırılmasına dair tövsiyələrin hazırlanması (o cümlədən qanunvericiliyin təkmilləşdirilməsinə dair);
• Tövsiyələrin bütün maraqlı tərəflərlə müzakirəsi (fəaliyyət növü çərçivəsində “Hesablama Palatasının fəaliyyətini tənzimləyən qanunvericiliyin təkmilləşdirilməsi imkanları mövzusunda” 1 günlük konfrans keçiriləcək. Konfransa bütün maraqlı tərəflərin nümayəndələri dəvət olunacaq. Konfransda layihə çərçivəsində hazırlanmış tövsiyələr paketi təqdim ediləcək. Bundan sonra maraqlı tərəflərin nümayəndələri rəylərini bildirəcəklər. Konfrans zamanı söylənən fikirlər tövsiyələr paketində nəzərə alınacaq və bundan sonra onlar Milli Məclisə təqdim ediləcək);
• Hesablama Palatası ilə vətəndaş cəmiyyəti qurumları arasında dialoqun qurulması (bu məqsədlə layihəni həyata keçirən ictimai birliklərin konsorsiumunun HP rəhbəliyi ilə görüşü təşkil ediləcək və dialoqun müntəzəm xarakter daşıması üçün müvafiq Memorandum imzalanacaq. Layihə çərçivəsində HP-nın iştirakı ilə konfrans keçiriləcək və HP-na həmin konfransda İllik Hesabatı təqdim etmək təklif olunacaq. Konfransa bütün maraqlı tərəflərin nümayəndələri dəvət ediləcəklər. İştirakçıların ümumi sayı 50 nəfər nəzərdə tutulur. Bu konfrans yeni ənənəyə, yəni HP-nın İllik Hesabatlarının yalnız Milli Məclisdə deyil, ictimayətə də açıqlanmasına yol açacaq);
• Regionlarda millət vəkillərinin iştirakı ilə ictimai dinləmələrin keçirilməsi (görüşlər Gəncə, Naxçıvan, Quba, Şəki, Şirvan, Lənkəran daxil olmaqla 6 region mərkəzində keçiriləcək.  Müzakirələrə Milli Məclis üzvləri dəvət ediləcək);
• Parlament qrupunun yaradılması (7-10 Millət Vəkili ilə Əməkdaşlıq Memorandumu imzalanacaq. Memorandumda məlumat mübadiləsi, tədbirlərdə birgə iştirak, qarşılıqlı ekspert yardımı; Milli Məclis üzvlərinin köməkçilərinin büdcə prosesi və Hesablama Palatasının vəzifələri və fəaliyyətinə dair xüsusi təlimdə iştirakı və digər sahələrdə əməkdaşlıq formaları əks olunacaq;
• TV kanalında müzakirələrin keçirilməsi (ANS TV kanalında «İqtisadi Forum» adlı həftəlik proqramda 5 dəyirmi masa keçiriləcək. Dəyirmi masalarda ictimai vəsaitlər üzərində nəzarətin vacibliyi, qanunvericilikdəki çatışmazlıqlar və 1-ci komponetin nəticəsi olan tövsiyələr müzakirə ediləcək);
• Populyar qəzetlərdə məqalələrin çap edilməsi (2 ən populyar qəzetdə Azərbaycan və Rus dilində tövsiyələrə həsr edilmiş 5 məqalə dərc ediləcək. Bu məqalələr ictimai vəsaitlərin səmərəli istifadəsinə, HP-na dair qanunvericiliyin təkmilləşdirilməsinə, HP-nın illik hesabatlarının müzakirəsinə həsr ediləcək);
• Radioda müzakirələrin keçirilməsi (ANS ÇM və Azadlıq radiosunda tövsiyələrə həsr edilmiş 6 veriliş keçiriləcək. Bu verilişlər ictimai vəsaitlərin səmərəli istifadəsinə, HP-na dair qanunvericiliyin təkmilləşdirilməsinə, HP- nın illik hesabatlarının müzakirəsinə həsr ediləcək. Verilişlərə tanınmış ekspertlər dəvət olunacaqlar).

Xüsusi məqsəd II. Milli Məclis üzvləri, vətəndaş cəmiyyəti fəalları və KİV-lərin bacarığının artırılması.

2-ci məqsəd üzrə fəaliyyətlər:

• Şərq Tərəfdaşlığı üzrə Vətəndaş Cəmiyyəti Forumunun Azərbaycan  Milli Platforması veb-səhifəsində (www .eap-csf.az) ictimai vəsatlər üzərində nəzarətə dair xüsusi bölmənin yaradılması;
• Sosial şəbəkələrdə (Facebookda və Tvitterdə) ictimai vəsaitlərin xərclənməsi və Hesablama Palatasının fəaliyyətinə dair forumların keçirilməsi;
• Jurnalist müsabiqəsinin keçirilməsi;
• Milli Məclis üzvləri və onların köməkçiləri üçün büdcə təhlilləri və HP büdcə rəylərinin qiymətləndirilməsi üçün Büdcə Bələdçisi vəsaitinin hazırlanması və nəşri (50 səhifədən ibarət Büdcə Bələdçisi 300 nüsxədə çap ediləcək və Milli Məclisin üzvləri və onların köməkçilərinə paylanacaq)
• Milli Platformanın fəalları üçün təlimlərin keçirilməsi (Bakıda və regionlarda);
• KİV nümayəndələri üçün təlimlərin keçirilməsi (Bakıda və regionlarda);
• Vətəndaş cəmiyyətinin fəalları, o cümlədən QHT-lər, gənclər təşkilatları və KİV-lər üçün Büdcə Bələdçisinin hazırlanması (50 səhifədən ibarət Büdcə Bələdçisi 300 nüsxədə çap ediləcək, paytaxt və regionların ictimai birliklərinə paylanacaq).